ফোটোগা কোন্নবা মাদর টেরিজা পূন্সি ৱারী

ডো: রোবার্ত রেনাতুস সনাবামনা মীতৈরোলদা হন্দোকপা
রোয়ল অমসুং গ্যারী ৱডসগী “মাদর টেরিজা পূন্সি ৱারী”

মাদর টেরিজানা মপুং ফান কতথোকপগী গুনবু অমত্তা ঙায়রবা পান্দম অমদা শাগতখি: লায়রনা লৈরবশিংবু মপূং ফান মতেং পাংবীবা হায়বসি ঈপুরোয়বু নুংশিবগী খুদমনি হায়বদু উতখি। মহাক্না য়ৌনা নিংজবা অমদি পুক্নিং অনী লোঙদনা থবক তৌব ঙম্বতনা, মালেম লৈকোয়সিদা তাঙখ্রবা লীক্লাই অমগুমনা শেংলবা মীওইবগী মতিকশিং অদুনা, মহাক্না চহি তরানিপালখক্তা ঙায়রিঙৈদা লম্বোইবী অমগী পুন্সিদা লেনবা হৌরকখিবদুদগী হৌনা মহাক্কী লাইনিং অমসুং মশিল অনীমকপু ঙমদুনা লাকখি। মহাক্কী শিনফম মতমগী খোঙলৈ তুংইননা মীরমগী চাওখতলবা সহর অমদা লৈব লম্বীশিংদা কোয়না চতলগা ঈপুরোয়গী থৌদা পাঙথোকপনা ওইখি। মসিগীদমক মশানা পামজনা খনখিবা সিনফম ফাওবা থাদোকপা ঙমননবা অরৈবী মতিং ফুদোক্তুনা হোতনখি। মসিগী মহৈ ওইনা নুংতিগী মৈরিগুম লংনা ঙাননা চাকখতলকখি অমদি মহাক্কী মৈরা হৌজিকতি মতুং ইল্লিবা মিশনরীশিংনা পুদুনা চতনরে। তোঙান তোঙানবা হৌরকফমগী মীওইশিং ফাওবা লাক্তুনা য়াওররে। অনাবা অমদি শিগদৌরবশিং, হুনদোক্লম্লবা পোকপদা ঙায়রিবা অঙাংশিং অমদি কুষ্ঠি থুংলবশিং তেংবাংনবা মরমগীদমক অমত্ত ওইনা হৌজিক পুল্লরে।
লাইরিক অসিনা মাদর টেরিজানা অঙাং ওইরিঙৈদা লেল্লকখিবা যুগোস্লাভিয়াগী স্কোপজিদগী হৌরগা, মফম অদুগী লাইনিং লম্বীদা ঙাওজবা ফুরুপ অমগী মনুংদা নীংঙাইদনা লৈজবা ইমুং অমদা নৌরিবী নুপীমচা অমা ওইনা নুংঙাইনা লেল্লকখিবা পুন্সি ওয়ারী অসিনচিংববু কুপ্না থিজিল্লুরগা হন্নমুক লীথোকলি। চহি তরানিপালখক্তা ঙায়রিঙৈ মতমদা মহাক্না ইহান হাননা তাখিবা লাইবাওদি ঈপুরোয়বু নুংশিবা অমদি থৌগল তৌনবা মরমগী ওইরমই। মদু পাঙথোকপা ঙমনবা ইন্দিয়া (ভারত) তম্না লাকখি। মমৈথংদা ময়ুম লমদমগুম নুংঙাইনা লৈজখি।
বৃটিশনা পাল্লিঙৈদগী হৌনা মমিং চতলবা চীংগী ষ্টেসন ডার্জিলিংদা লৈবা লোরেটো কনবেন্টতা লৈরকখিবা অদুনা ইন্দিয়াদা ইহান হান্না লৈবা হৌখিবা মফম হায়বদু ওইখি। হিমালয় মখোঙগী অচিকপা লৈতেম মান্নবা লমদম অমদা লৈবা কনবেন্ট অদুমক মাদর টেরিজাগী অহানবা ময়ুমনি। মফমদুদা মহাক ইংলিস, বেঙ্গালি অমসুং হিন্দি তমখি। মমৈথংদা মহাক কলিকতাদা লৈবা লোরেটো এনটালি স্কুলদা লৈশাবী মচাশিং লাইরিক তম্বীবগী থবক্তা মশামক কতথোকখি।
মহাক্না মথক থোংবদগী অনীরকশুবা ওইনা য়াথং হেক ফংবগা কলিকতাগী লম্বীশিংদা হিংলিবা লায়রবদগী লায়ররবশিং মরক্তা পুন্সি লেল্লুরগে খননা মখোঙ থাংদোরকখি। খুনাইনা হন্নফাও য়েংবীদ্রবা অমদি থওই ৱাওইবীদ্রবা মীওইশিং অদুগী থবক লেপ্পা লৈতনা পায়খতলকখি।
মাদর টেরিজাগী শেংলবা থবক্কী পাঙ্গলবু ঐখোয় পূমনমক্তা ফংহন্নবা অমসুং পীবীরক্নবা মহাক্কী পুন্সিগী থেংখাং খুদিংদগী লৌরকপা ফোটোগ্রাফশিংনা লাইরিক অসি ইথোকখিবনি।

মাদর টেরিজাগী অইবা:
রোজর রোয়ল বৃটেনগী খ্বাইদগী শকখঙলবা পুরোহিতশিং মনুংদা অমা ওইরমই। মহাক ইতোন কোলেজগী পুরিত, রেডিও টুগী গুড মোর্নিং সনডেগী প্রজেন্টর, অমদি হকচাং শোইনাইরবা নহারোলশিংগী মহৈ তমফমশঙ হ্যামিসফিয়ারগী অ্যালটোনদা লৈবা লোর্ড মেয়র ট্রেলোর কোলেজগী পুরিত মথং মথং ওইরকখি। মহাক্না চাং নাইনা রেডিও টুগী সনডে প্রোগ্রামদা পুংখায় অমমম নোংমাইজিং খুদিংগী শরুক য়াখি। চয়োল খুদিংগী ফোংবা ৱুইমেন্স ৱীকলীগীদমক লমায় অমমমসু ইখি। মহাক্কী ফোঙখ্রবা লাইরিকশিংদি বেষ্ট সেলিং এ ফিয়ু ব্লোক্স ফ্রোম ব্রোডৱে থারগা রোয়লি একচেঞ্জ, পিকিং অপ দা পীছেস অমসুং টু হেড অ্যান্ড টু হোল্ড অসিনি।

ফোটোগ্রাফর অমা ওইনা:
গ্যারি ৱুডস ময়াম্না শকখঙনরবা ফোটোগ্রাফর অমনি। মহাক্কী ফোটোশিং টোকিও, প্যারিস, লন্ডন, নিয়ু য়োর্ক অমসুং অতৈ অমেরিকাগী সহরশিংদা উতখ্রে। মহাক্কী ফোটোগ্রাফশিং কালিফোরনিয়াগী পোলে গেটি মিউজিয়ম অমসুং প্যারিসকী বাইব্লিওঠিক নেসন্যালদা উবা ফংগনি। হেন্দোক থোইদোক্না মহাক অ্যাবাণ্ট গারডি সিনেমাগী অতেনবা ফিলম নিফু হেনবদা মমিং য়াওদুনা শরুক য়াখি। মহাক্কী ময়ুম লণ্ডনদনি।
মাদর টেরিজাগী পূন্সিনা ঐখোয় অয়াম্বদা খুদম অমমুক পীনবীরে; লাই নীংবদা ঙাওজখিবা পুন্সি অমা, চহি খুদিং ঙাননা অমসুং লংনা চাকলকলিবা মৈরা অমা ওইররে। লায়রববু য়োকপীরে, মখোয়বু অশিফমদগী হিংগতহন্দুনা অহিংবা মী অমমম ওইহল্লে, য়াংগংলবা হকচাংশিং খৃষ্টকী হকচাংমক্নি খননা মফি শেতহললে, খঙঙমদবা ৱাহন্থোক পীরিবা মিশনরীজ ওফ চেরিটিদা মিশনগী থবক তৌহললে। নুপীজা ওইবী মথনতনা থবকশিং অসিগী হিমায় চুম্বগা লোয়ননা মহাক্কী মিশন অমসুং তোঙান তোঙানবা লাইনীং কাঙলুপশিংগী মশীং লাঙমদবা মীওই কয়ানা মহাকপু লেঙদনা লৈহননীংখিবা মফম কলিকতাগী লম্বী লমজাওদা পুন্সি লেললুনবগীদমক লোরেটো কনবেন্টকী কুয়োমনুংদগী করমনা লিতথোকসিগে খল্লিঙৈদা মহাকপু থৌদারকখিবা য়াথংশিং অমদি মরী লৈনবা ফোটোশিং অদুনা লাইরিক অসিগী ৱারী ওইরি।

ৱামাং য়ানবা
তুংদা মাদর টেরিজা কৌনা খঙনরক্কদৌরিবী সেণ্টকী মিংথোল ফংখ্রবী ইমা অসিগী অঙাং ওইরিঙৈদা থোনখিবা মিংদি অ্যাগনিছ গোনছা বোজাকছিন হায়বসিনি। আগষ্ট ২৬, ১৯১০ ইংদা মেসেডোনিয়াগী স্কোপজিদা থায়নদগী খুন্দাদুনা লৈরক্লবা ইমুং অমদা মহাক পোকখি। মশাগী চহি ৮ শুরকপা মতমদা অপোকপা লৈখিদ্রে। ইনখতলকপা মতমদা চর্চ্চকী থবক ইনখাংদা চিতথবা লৈতনা য়াওখিবী নুপীমচা অসি মশাগী চহি ১৮ খক্ত ঙাইরিঙৈ ১৯২৮ ইংদা ময়ুম থাদোকতুনা অয়ারল্যান্দা লাইনিং লম্বীগী পুন্সিদা খোঙদাখি। মথংদা জানুয়ারি ৬, ১৯২৯ ইংদা কলিকতাগী হিথাংফমদা ইহান হাননা থুংলরবা মতুংদা ডার্জিলিং তম্না লাকখি অমদি মফমদুদা পুন্সি লেনবা হৌরকখি। মে ২৪, ১৯৩৭ ইংদগী মহাকপু, ‌“মাদর‌‌” হায়বদি “ইমা” হায়না কৌবা হৌনরকখি। ইং ১৯৩০ অমসুং ১৯৪০ গী চহিশিংদ কলিকতাগী সেন্ট ম্যারি বেঙ্গালী মেডিয়াম স্কুলদা ওজা ওইখি। ইং ১৯৫০ দগী ১৯৬০ গী অঙনবা মতম ফাওবদা মিশনরীজ ওফ চেরিটিগী থবক কলিকতা মনুং অমসুং মপান অমদি ভারত শিনথুংনা শন্দোকখি। ফেব্রুয়ারী ১, ১৯৬৫ ইংদা পোপ পোল তরুকশুবনা মঙোনদা কনগ্রিগেষন পাঙথোকপা ঙমনবগী পাংগল লৈননবা ডিক্রী ওফ প্রেজ পীখি। মসিনা পোনটিফিক্যালগী থাক য়ৌনা কাখতপা ঙমখি।
ভারতকী ‌‌ওয়াংমদা ইহান হান্না হাংদোকখিবা ফাওনদেসনদি ইং ১৯৬৫ দা বেনিজুয়েলাগী কোকোরোতেদনি। মহাক্কী মিশন অসি ইয়ুরোপ অমসুং আফ্রিকাদা মথং মথং শন্দোকখিদুনা ইং ১৯৬০ দগী ১৯৮০ ফাওবদা মালেম শিন থুংখি। আষ্ট্রেলিয়া, মিডল ইষ্ট, নোর্থ আমেরিকা অমদি ইয়ুনাইটেড কিংদমদা য়ুম শাদুনা থমখি। ইং ১৯৭৯ দা নোবেল প্রাইজ ফংখি। চহি অসিফাওবদা মিশনরি ওফ চেরিতি মশীং ১৫৮ শুখি। চহিসিমক্তদা জাগ্রেব, ক্রোসিয়া অমসুং ইং ১৯৮০ দা ইষ্ট বারলিননচিংবা কম্ম্যুনীস্ট লৈবাকশিংদা শন্দোরকখি। ইং ১৯৮০ অমসুং ১৯৯০ দদি কম্ম্যুনীষ্ট লৈবাক পুমনমক য়ৌবা ঙমখি। হান্নগী সোবিয়েত ইয়ুনিয়নখক্তদা ফাওন্দেসন ১৫ শুখি। অদুবু লাইবক থীবদি মাদর টেরিজানা চাইনাদা ফাওন্দেসন থমননবা কয়ারক হননা হোতনরফাওবদা অমা ফাওবা থম্বা ঙমখিদে। ইং ১৯৮৫ গী ওক্টোবর থাদা য়ুনাইটেদ নেসন্সগী জেনরেল এসেমব্লিগী নিফুরকশুবা চহিগী মীফমদা ৱা ঙাংখি। চহিসিগী খৃষ্টমাস মাংজৌননা নিয়ুয়োর্কতা মাদর টেরিজানা “নুংশিবগী মনা” কৌবা খুদোল শঙলেন অমা হাংদোকখি। মসি এডস পকপশিংগীদমক্তা মহাকনা হাংদোকখিবা শঙলেনশিংগী মনুংদা ইহান হানবনি। মতুং তারকপা চহিশিংদা অতৈ শঙলেন কয়ামরুম ইয়ুনাইটেদ ষ্টেটস অমসুং মালেমগী অতৈ মফমশিংদা মথং মথং হাংদোকখি। ইং ১৯৮০ লোইরমদাইদগী ১৯৯০ ফাওবদা মাদরগী মশা খংশোক শোকচিল্লকখি। মালেম শিন থুংনা কোয়খিবী ইমা অসিনা লায়রবা অমসুং খুদোংথিবা নংলবশিংগী লৈফম কয়ামরুম মালেমগী কাচিন কোয়া থুংনা থমখি। খা অফ্রিকা, অ্যালবানিয়া, ক্যুবা অমসুং লান নংলবা ইরাক লৈবাকশিংদা অনৌবা কম্ম্যুনিটিশিং লিংখতখি। ইং ১৯৯৭ ফাওবদা য়ামদ্রবদা মেম্বর ৪০০ শুখি অদুগা লৈবাক ১২৩ দা ফাউনদেসন ৬০০ লিংখতখি। ইং ১৯৯৭ কী কালেন থা মনুংদা মশা য়ামনা শোল্লকলবী মাদর টেরিজানা রোম, নিয়ু য়োর্ক অমসুং ৱাশিংটন কোয়না থুংনা চতলমলগা কলিকতাদা হল্লকখি। চহি অসিমক্কী সেপটেম্বর ৫, নুংদাং পুং ৯.৩০ তাবদা মাদর হাওসতা মালেম পূম্বগী ইমা ওইখ্রবী মাদর নোংগাখি। থৱায় য়াওদ্রবা হকচাং লোরেটো কনবেন্টকা থংননা লৈবা চহি ৬৯ গী মমাংদা মহাকনা ইহান হাননা থুংলখিবা সেন্ট থোমাস কৌবা চর্চ্চ অদুদা পুখি। ভারতকী মনুং অমসুং মপানদগী কাংলুপ অমসুং ধর্ম্ম পুমনমক্কী মীহুতশিং লাক্তুনা ইমাবু ঈকায় খুম্নবা ঊতলখি। সেপটেম্বর ১৩ দা স্টেট ফ্যুনরেল পাঙথোক্তুনা প্রোসেসন চতখি। মোহনদাস করমচান্দ গান্ধী অমদি জরাহরলাল নেহরু অনিগী অশিবা হকচাংশিংদা উতখিবা চপ মান্নবা ঈকায় খুমনবা অদুগুমনা `গন ক্যারিয়েজ’ অমদা মহাক্কী অশিবা হকচাং কলিকতাগী লম্বীশিংদা পুদুনা চতখি। মালেম পুমনমক্কী লৈবাকশিংগী প্রেসিদেন্ট, মহারানি অমসুং অখন্নবা এনভোয়শিং য়াওরখি।
-ডো: রোবার্ট রেনাটুশ সনাবাম

ৱা হৌ দো ক
শিংনরকপা খুদিংমকপু থেংনবা হায়বসি মাদর টেরিজাগী পুন্সিগী শরুক অমা ওইনা মতম চুপ্পদা ওইদুনা লাকখি। নহা ওইরিবী নুপীমচা অমা ওইরিঙৈদা ঈপুরোয়না মহাকপু লাইনিং খুনাই অমদা চঙলকনবা কৌরকলব্রা হায়বসিদা পুক্নিং লুপতুনা লৈরিঙৈ তানজা অমদা, মহাকপু পোকচবী পলেম ড্রানানা মঙোন্দা হায়খি, “‌ইমাগী ইবেম্মা, নহাকনা করিগুম্ব থবক অমা পায়খতকে নীংলবদি, করিমত্তা চিংনবা য়াওদনা মদুমক পায়খতপা তমউ। চিংনবা লৈরবদি সুকপায় পায়খতপা তৌরুগনু।‌” অদুম ওইনমক ঈপুরোয়দা কয়া য়াম্না মহাক্কী থাজবা লৈরবগে হায়বসি সুকথি থিরুবা তৌদনা মীওইবা কাঙলুপকীদমক লাইগী মপাওখোল অমসুং শীংনরকপা অনীমকপু মায়রোং য়াব ঙমননবগী পুন্সি অমদা তাওদুনা মহাক চতখিগদৌরে হায়বসি কনামত্তনা মতমদুদা থাজখিদে।
তশেংনমক মাদর টেরিজাগী সুমহতনীঙাই ওইদবা পুক্নিং মতৌ অসি য়েংলুরগা ইচম চমনা হায়বা তারবদি মীথোয় মীহেল্লবা মীশক অসিদা লৈরমলিবা উঙমদবা মতিক-ময়ায়, পাংগল অমসুং থৌনা অসি ঐখোয়না খঙবদা ৱাগনি। লুরবা ফিবমশিং থেংনবদা মহাক্কী চপ য়ুংবা পুক্নিংগী ফিরেপ, থিংবা ঙমদবা লিংজেল অমদি মপুং ফান কতথোকপা ঙম্বগী থৌনা অসিনা মহাকপু মালেম অসিগী মনুংদা চাংদমনীঙাই লৈতবা ফিদা অমদা ফমহল্লিবনি।
“‌তুংদা হৌরকলিবা মীরোলশিংননি মহাকপু সেন্ট (লাইনীংবী) অমা ওইনা লেপ্পা ঙমলগদ্রা হায়না য়েংগদৌরিবসি। ঐহাক্না মসিখক্তংদি হায়বা ঙমই মদুদি মহাক অমম্বা মফম অমফাওবগীদি ঙালহনবা ঙম্বা মঙাল অমা ওইরে, মীনুংশি পোক্নদ্রবা মতম অমদনা খৃষ্টকী নুংশি পাওজেল পুবা অহিংবা মীশক অমনি, অতোপ্পা লাই থাজদবা মীওইশিংদনা ৱাহৈ অদুমক্না ঐখোয়গী ঈরক্তা থৌজাল অমসুং অচুম্বগী মশক ওইদুনতা লৈরবনি”।
মসি ফাওরবা অইবা অমদি রেডিও পাওমী ম্যালকোলম মুগারীজনা মাদর টেরিজাগী মরমদা ইননবা মাদরগা ৱারী শানরুরবা তুংদ ফোংদোকরখিবনি। অইবা অসি মতম অদুদা ময়ামনা চতনরিবা লাইনিং লম্বী অসি চতপা মীশক ওইরমদে। মহাক চর্চ্চ অমসুং চর্চ্চ লিংখতপবু সুকয়া য়ানীংদবা মীশক অমসু ওইরমই। অদুবু য়েংবদা তুশোল মানশোননবী থীকনেম্বী নুপী অসিনা ঈপুরোয়বু নুংশিয়ু হায়না মঙোন্দা ঙাঙ শকলকখিবশিং অদু নিংশিংলুবদা মমিং খ্বাইদগী চতলে হায়রিবা লাইনিংবশিং অদুনা ঙাঙখি-শকখিবা ৱাহৈ অমদি লাইবাওশিং অদুদগী য়াম্না হেনখি।
ইং ১৯১০ গী আগস্ট ২৬ তা অ্যালবেনিয়ান ফুরুপকী বোজ্যাকসিউ কৌবা শাগৈ অমদা পোকখিবী মাদর টেরিজাগী পলেমগী মিং ড্র্যানা কৌই। অ্যাগনিছ গোনছা মাদর টেরিজাগী অঙাং ওইরিঙৈদা ময়ামনা কৌনবা মিংনি। মতম অমদা মাদর কৌনা মালেম শীন থুংনা ফাওরগদৌরীবী নুপীমচা অসি পলেম পন্থৌগী অঙাং অহুমগী মনুংদা খ্বাইদগী ইতোন তোনবীনি। সারবিয়াগী শরুক অমা ওইরিঙৈ মতমগী যুগোস্লাভিয়াগী টাউন অদুগা তুংদনা মালেমগী মনুংদা ঈরাং থোক্কনবা লমশিংগী মনুংদা অমা ওইরক্কদৌরিবা স্কোপজিদা চাওরকখি। মহাক পোকখিবা চহিদুমক্তদা অহানবা অ্যালবেনিয়ান লান হৌরকখি। অহানবা বোলক্যান লান চহি অনীগী মনুংদা থোরকখি। ইং ১৯১৪ দা ইয়ুরোপ পূম্ব মালেমগী অহানবা লানজাও থোরক্কদবগী নুংনাংবা পোক্নখি। বোলক্যান লৈবাক মনুংশিংদ ঈরাং থোকপা হায়বসিসু লানজাও থোরক্নবগী মরম অমা ওইরমই।
বোজ্যাকসিউ ইমুং মনুং পুমনমক মফম মরাং খঙদনা চরাংনবা অদুনা য়ামনা নুংঙাইহল্লমদে। অ্যালবেনিয়ান ইমুং অমা ওইনা সারবিয়াদা লৈবদা মখোয়গী ইমুং মনুং অৱাত-অপা লৈতবা অমদি নুংশি চানননা লৈবা অমা ওইজরবসু লানগী মৈশা ফংদবদি ওইথোকলমদে। অ্যাগনিছ গোনছাগী ঙল্লিঙৈ পুন্সি লায়র মৈশা শুকলাং লাংখিদে।মহাকপু পোকপা পন্থৌদি ইয়ুরোপ থুংনা অকে অমৌগী পোত চৈ ললোনবা চতপা মীশক অমা ওইরমই। মরাং কায়না ললোন্দুনা ওইজ ওইথক য়াম্ন ফংলকখিবা মীশক অমসুনি। মহাক্না য়ুমদা হল্লকপা খুদিং য়ুমগী মীওইশিংনা খৌরাংনা ঙাইদুনা লৈরমগদবা পোতশিং লৈরকখি। মহাকনা ময়ামদা লংফৈদগী থেংনরকখিবা ৱারীশিং লীদুনা য়ামনা নুংঙাইনা তাহল্লমই। অদুম ওইনমক মহাক ৱারক চেতপা মীশক অমদি ওইরমই‌। অ্যাগনিছ, মচেম আগা অমসুং মবুং লাজার মখোয় খুদিংমক মপাগী নীংবা থুংননবা হায়দুনা মপানা থৌদারকপা খুদিং পাঙথোকপা তারমই। “‌নখোয় কনাগী মচাশিংনো হায়বা কৈদৌঙৈদসু কাওথোকফদে।” ৱাহৈশিং অসি মপা ইবুংঙো নিকোলানা মচাশিংদা তোয়না পনখিবা ৱাফমনি।
অঙাং অহুম্মক মখোয়না লৈরিবা লৈকায় অদুগী চর্চ্চনা চলায়বা ইলিমেণ্টরি স্কুল অমদা পুননা লাইরিক তমহল্লমই। মখা তারকপদা নুপী মচিন মনাও অনীমক স্কোপজি জিমনাজিয়মগী ষ্টেট সেকেন্দরী স্কুলদা থারমই।
তশেংনা হায়রবদা মচিন মনাও অনীমক লাইরিক য়ামনা ফবা মহৈরোয় ঙাক্তনি। আগা থোইদোক হেন্দোক্না খঙগন উগনবী অমা ওইরমই অদুগা অ্যাগনিছ গোনছা হংলুবা খুদিং খঙগনবী অমদি খঙদ্রবসু খঙননবা হোতনদুনতা লৈগনবী নুপীমচা অমা ওইরমই। অনম কনবা অদুগা তাশিল খোমজিনবা য়ামনা পাম্বী অমসু ওইরমই। ঈশৈ নোংমাইগী হীরমদসু অদুমঙাই, মখোয় অনীমক পূননা চর্চ্চ অমদি অ্যালবানিয়ান ক্যাথোলিক পালা (কোয়ার) শিংদা য়াওমিন্নদুনা তোয়না ঈশৈ শকমিন্নখি।
মবুং লাজার ইং ১৯২৪ দা অষ্ট্রিয়াগী মিলিটরী স্কুল অমদা মহৈ তমলুনবা ময়ুম থাদোক্তুনা চতখি। মহাক্কী হোবিদি শান্ন-খোতনবনি অদুনা অশঙবা তানজা অয়াম্বদা মপান থোক্তুনা মহাক্কা লেংগা ওইবা নহারোলশিংগা শান্নদুনা মতম লেনখি।
মখোয়গী পলেম ইমা ড্র্যানা মশাগী লম লৈজবা ললোন ঈতিক তৌবা নিপা অমগী মচানুপী ওইরমই। মপুরোয়বগুমনা মহাকসু খুদোংথীবা থেংনবা কিরমদে অমদি থবক য়ামনা কননা শুগনবী অমসু ওইরমই। মসিনা মরম ওইদুনা অ্যাগনিছনা চহি নিপালখক্তা ঙায়রিঙৈদা অহল ওইরবা নিকোলানা ইখঙ খঙহৌদনা নোঙ্গাখ্রবসু ড্র্যানানা মচাশিংগী মহৈ মশীং তমহনবগী হিকতোকপা য়াদ্রবা থৌদাং পুম্নমক ইরায় লায়না লৌবা ঙমখি। মহাক্না খুতনা লোনবা পোতচৈ য়োন্ননবা দুকান অমা হাংদোকলমই। মমৈথংদদি ফরাংজি য়োনবদা মমিং চত্তুনা লৈরবা স্কোপজিদা খুতনা লোনবা ফরাংজি পুমনমক মহাক্কী দুকান অদুদা য়োনখি। মমানা মচাশিংবু মখোয়দগী হেন্না ফিবম শোক্লবশিংবু অখন্ননা য়েংশিনবীনবা পাওতাক পীরমই। মাদর টেরিজানা নিংশিংলকখি, “‌স্কোপজিগী মনুং অমসুং অকোয়বদা লৈব লায়রবা অয়াম্বনা ঐখোয়গী য়ুমগী লৈফম খঙখি মরমদি মখোয়না ঐখোয় য়ুমদগী হনখিবা মতম খুদিংমক্তা মখোয় অমত্তা খুত হাঙনা চতহনখিবা তৌদে। ঐখোয়গী য়ুমদা নুংতিগী মী থুংলখি। হেক থুংলবগা ঐনা খঙনিংদুনা ইমাদা হংজখি, কনা কনানো লাকলিবশিংসে?” অদুদগী ঐখোয়গী ইমানা খুমলক্কনি, “‌খরদি মরীমতানি অদুবু অয়াম্বদি ঐখোয়গী মী ঙাক্তনি।” “‌মশক খঙবা ঙমখিদবা অদুবু ইমানদি ঐখোয়গী মী ঙাক্তনি হায়দুনা পীজপীথক য়ামনা তৌবীখিবা মীওইশিং অদু কনা লৈজদ্রবা নংবদা ঊন পক্লবা লায়রবশিংনি” হায়বসি ঐহাক্না খর চাওরকপা মতমদা খঙবা ঙমখি।
মচাশিংবু অতোপ্পশিংগী অৱাত অপা খঙজিন্নবা তম্বী তম্বীনা ড্র্যানা (নানা লোকে হায়বদি থৱায়গী মমা হায়না অঙাংশিংনা নুংশিনা কৌনবা মিংগৌ) না করিগুম্বা মখল অমত্তগী পোত-চৈ অরেম্বদা হুন্দোকখিবা য়াদে হায়বসিগী পারা ফাহল্লমই। নোংমগী নুংথিল অমদি অঙাং অহুম অদুনা য়ামনা পঙনা শীজিন্নবা লূদবা ৱাহৈ ৱাতাশিং তাঙৈ তাথোক্লগা ড্র্যানানা ফুক হৌগত্তুনা কা অদুদগী মপান থোকখিবতা নত্তনা থাওমৈসু মুতথতলমই। মপান থোকলমদাইদা অদুগুম্বা কান্নদবা ৱারেম থৌরেম অদু ঙাং শক্ননবা অরেমবদা মৈ থানগদবা নততে হায়নসু অমুক্কা হায়রমখি।
ড্র্যানানা খৃষ্ট্যান লাইনিংদগী মশা অমদি ইমুং মনুংগীদমক অঙকপগী মশক ফংলবা পাঙ্গল ফংবা ঙমজখি। নুংথিল খুদিং ইমুং মনুং হুপনা ফমফম কাদা ফমলগা রোজরি হায়মিননৈ। মখোয়গী ইমুং অ্যালবেনিয়া ফুরুপনা নমনা য়াওবা সেক্রিড হার্ট কৌবা লাইশঙ (প্যারিশ) অদুগী মখাদনি। স্কোপজিদা লৈবা য়ামনা পীকখ্রবা মশীং য়ামদবা কাংলুপ অমা ওইবনা মখোয়না মখোয়গী চর্চ্চপু লাইনিং লম্বীদগী হেনদোক থোইদোক্না উজখি। ময়ামগী পুনফম মফম অমসু ওইরমই। মশাগী ফুরুপকী পাথাং পুথাংশিং অমদি মশাগী শক্তম ঙাকননবা মফম ওইনসু লৌনরমই। অ্যাগনিস গোনছাদা অকনবা ইথিল অমা পীবা ঙম্বা প্যারিশ অদুদা সোসাইটি ওফ যিজসতগী ফাদর জ্যাম ব্রেনকোবিক কৌবা প্রিস্ট অমা লাকখি। প্যারিশ অদুগী নহারোলশিংগীদমক্তা মহাকনা “‌ব্লেসিদ সোড্যালিটি ওফ বারজিন” কৌবা লুপ অমা লিংখতলমই। লুপ অসিগী মেম্বর ওইরুবদগী অ্যাগনিছ গোনছাগী পুন্সিদা অহোঙবা কয়া লাকখি। লুপকী মেম্বরশিংনা সেণ্ট ইগনেসিয়স লোয়োলাগী ইং ১৫৬৩ দা লীংখতখিবা লুপ অদুগী ৱাহংশিং “‌খৃষ্টগীদমক ঐহাক্না করি তৌখ্রবগে?‌ খৃষ্টগীদমক ঐহাক্না করি তৌরিবগে? খৃষ্টগীদমক ঐহাকনা করি তৌগনি?‌” মখোয় অসিগী পাওখুম পীননবা কননা হোতনখি। শীংনরকপা অমনি হায়না লৌখি। অ্যাগনিছ গোনছাগুম্বী মিতশিং নাশিংবী অমগী মফমদদি মসি খঙশিন উশিন্নদনা লৈথোকপা খক ঙমলমদে।
শীংনরকপা অদুগা লোয়ননা সোড্যালিটিগী মেম্বরশিংনা সেণ্ট অমসুং মিশনরিশিংগী পুন্সি নৈনবদা য়ামনা থৱায় তাজরমই। ফাদর জাব্রেনকোবিক জীসুইট মিশনরিগী থবক্তা থৱায় য়ামনা য়াওরমই অদুনা মহাক্কা লোয়নরিবা লাইশঙগী থৌ পুরিবা নহারোলশিং অদুবু পুক্নিং থৌগতনবা পান্দমদা অখণ্নবা থবক পায়খতখি। মহাকনা মিশনগীদমক তৌগদবা থবকশিংগী শরুক ওইনা চাং নাইনা অফবা ৱাপাও শন্দোকলমই অমদি মরু ওইনা লায়রবা অমদি লাইথুং থুংবশিংগীদমক্তা অখন্ননা তৌগদবা থবকশিং অদুগী মরমদা ময়ামদা শুগাইনা তাকলমই। ইং ১৯২৪ দা যুগোস্লাবাকিয়াদগী বেঙ্গল তাণ্না চতখিবা পুরোহিত (প্রিষ্ট) শিংনা ইরকখিবা চিঠিশিং অদু ফাদর জ্যামব্রেনকোবিকনা মখোয়দা পাদুনা তাহনবগা লোয়ননা মখোয়গী মরমদা ৱারী লীবিখি। হায়রিবা মিশনরিশিং অদু সমুদ্রগী গঙ্গা তুরেল তাফমদা লৈবা উমং লৈবা সুন্দরবন অমদি কলকতাগী চিদাইশিং অসিদা লৈহনখি। ৱারী তারিবা নহারোলশিং অদুগী মফমদদি হায়রিবা মিশনরিশিং অসিগী পুন্সি অসি মরিং মরাংবা, শুমহতয়াই পুবা অমদি শীংননা চঙশিনবা ওইনা লৌরমই হায়বদি অশুক্কী মতীক মওং তানা নহারোলশিং অদুগী খঙনিংবা হেনগতহল্লমই। অ্যাগনিছ গোনছানা তারুবা খুদিং তশেংনমক নুংঙাইবা পোকখি। মহাকনা ফাদর জ্যামব্রেনকোবিকনা মিশনগী থবক্কী মরমদা লমদম অদুগী মীওইশিংদা শন্দোকনা তাকপদা মতমদুগী মিশন পুমনমক্কী লৈফম তাকপা মালেমগী মেপ অমা য়েকলদুনা মতেঙ পাংলমই। মখূরানা পোকপা মবুং অমনা ঈশৈ তমবিবদগী ফংলকপা শেলশিং অদু মহাক্না ইন্দিয়াদা মিশনগী থবক চতপদা মঙোন্দা পীবীনবা হায়জরমই। চর্চ্চকী মিশনরি থবক্কীদমক্তা অখণ্ননা লাই খুরুম্বগী থবক পাঙথোকপা লাইশোল লুপ মচা অমদসু মহাক্না শরুক য়ারমই।
অ্যাগনিছ গোনছাগী লাইনিং লম্বী চাওখতহনবদসু মহাক্কী লেট নাইট খোঙচতশিংনা অসুক্কী মতীক পাঙ্গল কননা মতেঙ পাংখি। ড্র্যানানা লেট নাইসতা লৈবা অৱার লেডি ওফ ছেরনাগোর লাইফমদা চাং নাইনা চত্তুনা লাই খুরুমখি অমদি মচানুপীশিংবুসু মহাক্কুমনা চতননবা খঙহনখি। মোনটিনেগ্রোগী অৱাবা চীংশাং পরেংদা লৈবা লাইশং অদুনা নহা ওইরিবী অ্যাগনিছ গোনছাদা পুক্নিং অমসুং হকচাং অনীমক তেকখতহনখি। মহাক মপাঙ্গল শোনবা অঙাং অমা ওইরমই, অরুম লাইহৌ তৌগনবী অমদি লোক শিথনা খুগনবী অমসু ওইরমই অদুনা মমানা অৱাংবা চীংগী নুংশিত নুংশা অদু মচানুপীগী হকচাংদা কাণ্নগনি খল্লমই। অদুবু অ্যাগনিছ গোনছাদি মতম চুপ্পদা লাইরিক অমা নত্রগা অমদা লুপতুনা লৈব মরমনা মচেম আগাদা মনাওনুপীবু পুরগা খোঙনা শাংনা চতলুনবা অমদি চতলুরবা মতুংদা মপুং ফান পোতথারিব্রা হায়বদুসু য়েংশিণ্নবা চেকশিণ্না শিণ্নরমই। মহাকনা লেটনাইসতা লেনখিবা মতমশিং মহাক্না অঙাং ওইরিঙৈদা ফংখিবা নুংঙাইবশিংগী মনুং চল্লমই।
ইং ১৯২৮ দা অ্যাগনিছ গোনছানা অ্যাশমশন ওফ বারজিনগী কুমহৈগীদমক মফমদুদা চতখিবদুনা মহাক্কী অরোয়বা খোঙচত ওইখি, অদুবু চাং নাইনা মহাক্ন চতখিবা খোঙচতশিং অদুনদি মহাকপু পুন্সি চুপ্পগী ওইনা ঈপুরোয়গী থৌগলতমক তৌনিংনবগী শিনথা করিনো তাকখি। মহাক্না মথনতদা হায়জখিবদি মশা পুমনমক ঈপুরোয়গী মফমদা পুমকত কতথোকনীংবগী অপাম্বা মশাগী চহি ১২ শুরকপা মতমদা ফাওরকখ্রবসু, মসিগীদমক লানথেংনবদা অতোপ্পা চহি ৬ অমগা চঙখি। মহাক্কী শিনথা তশেংনমক করিনো হায়বসিদা খনথরুবা মতমদা মহাক মশামক ঙকপা য়াওখি অদুগা করিগুম্বদা শিন্থা অমা লৈরমদুনা তৌখিবা থোকলবসু মহাকনা মদু করমনা তৌরমগদগে হায়বসিনি। ফাদর জ্যামব্রেনকোবিকনা মঙোন্দা হায়খি মদুদি মহাক্কী শিনন্থা অমা লৈবা তারবদি মদু পাঙথোকপদা হরাও তয়ামগদবনি। মহাকনা মঙোন্দা শন্দোকনা তাকলমই মদুদি ঈপুরোয়না কৌরে খল্লবদি, ঈপুরোয়গী থৌগল তৌবা অমসুং য়ুমলোন্নবগী মতেঙ পাংবা মতমদা হরাও হরাওনা পাংগদবনি। য়ৌনা নুংঙাইবা ঙম্বা হায়বসি পুন্সিগী শিন্থা অমবু খনবদা লমতাকপা খুতলায় (কমপাস) অদু ওইগদবনি।
কম্পাস অদুনা নোংপোক মায়কৈ পুথোকপা তাই। অ্যাগনিছ গোনছা ময়ুম থাদোক্তুনা চতপা ঙমলমদে অদুবু ঈপুরোয়না মহাকপু লমবোইবী ওইনবা হায়রকপদা নত্তনা মিশনরী থবক পাঙথোকউ থৌদারক্লবদি য়ুম থাদোক্তুনা চতকে চপ য়ুংনা লেপলমই। তারু উরুবা পুমনমক অদুদগী মহাক্কী থম্মোয় ইন্দিয়ারোমদা মিতারকখি। মহাক্কী মমাদি ওয়াফম অসিগী পাও তাবফাওবদা য়ামনা ওয়ারমই। মহাক মশামক মশাগী কা মনুংদা থোঙ লোনশিনলগা পুং ২৪ চুপ্না মপান থোরকপা তৌদনা লৈখি। অদুম ওইনমক মহাক্কী অনিংবশিং মতম পুম্নমক্তা ঈপুরোয়না কৌরকপগী মখা পোনগনি হায়বসি মহাক খঙলমই, অমদি মহাক্কী থম্মোয়দা পুন্সিচুপ্পা লেঙদনা লৈখিবা, “‌নখুত অদু ঈপুরোয়দা-ঈপুরোয়গী মখুত্তা থমউ-অদুগা মতম পুম্বদা মহাক্কা লোয়ননা চতমিননৌ। হায়রিবা পাওতাক অসি মমানা মচানুপীদা পীবীখী।
অ্যাগনিছ গোনছানা বেঙ্গোলদা মতমদুদা মিশনরী থবক তৌদুনা লৈরিবা ওর্ডর ওফ লোরেটো লম্বোইবীশিং অদুদা য়াওজগে হায়দুনা চে থারমই, অদুবু মখোয়গী মাদর হাউসতি ডব্লিনদা লৈরমই। মদু য়ারকপদগীদি মহাক সেপ্তেম্বর ২৫, ১৯২৮ ইংদা স্কোপজি থাদোকখি। ওর্দর অদুদা য়াওমিন্নগদবা অতোপ্পা বেটিকে কানজক কৌবী অমবু ঙাইবা ওইনা জাগ্রেবতা লৈরমই। বেটিকে থুংলবগা অ্যাগনিছ গোনছানা মহাক্কী ময়ুমদা অরোয়বা কায়না পাওজেল পীরমলগা, ডাব্লিন তম্বা খুদোংথিরবা খোঙচত্তা মহাক্কা লোয়ননা চতমিন্নখি। মখোয়না থুংখিবদা লোরেটো লম্বোইবীশিংগী মাদর সুপরিয়ার অমসুং অতোপ্পা সিষ্টার অনীগনা মখোয়বু ওকপীখি।
অ্যাগনিছ গোনছা অহৌবগী শিন্দমশঙদা চয়োল তরুক্তমক তমখি, মতম অসিদা মহাক ইংলিস তম্বগা লোয়ননা মহাকনা শরুক য়াররিবা ওর্ডর অদুগী মরমদা খরদং তমশিনখি। লোরেটো সিষ্টারস ইং ১৬০৯ দা ম্যারি ৱার্ড কৌবী ইংল্যান্ডগী য়োর্কসয়ারদগী নুপী অমনা লিংখতখিবা ব্লেশিদ বার্জিন ম্যারি ইনষ্টিট্যুতকী আইরিশ মশাগীনি। ক্যাথোলিক চতপা ইংলিস মচাশিং হাতপা হৌরকপা উবদগী ৱার্ড ফ্ল্যান্দরসতা চেল্লমই। মীরৈবাক্তা য়ুম হোংবা হায়বসিনা মহাক্কী শিনথা মখা চতথবা ঙমনবগী অমত্তা ঙায়রবা খুদোংচাবা হায়বদু ওইরমই। অদুবু মহাক্না লনথুম পুদুনা চতপা য়ানবা হায়জরমই, মরমদি মতেং নিরকপা লায়রবশিংদা পীবা য়াব মতেঙ পীনীংলমই। ম্যারি ৱার্ডকী মঙ অদু মহাক্কী মোংফম মথক্তা অসুম্না ইরমই, “‌লায়রববু নুংশিবা, চপ মান্ননা খাঙমিন্নবা, মখোয়গা লোয়ননা হিংমিন্নবা, শিমিন্নবা অমদি লানমিন্নবা, পুম্নমক অসি ম্যারি ৱার্ডনা পামজরম্বনি। লিশাং শিতনা ফজনা চেকশিননা হোতনরবা তুংদা, ওর্ডর অদু ইং ১৮৪১ দদি কলকতাদা শঙলেন অমা লিংখতপা ঙম্বগী পাঙ্গল লৈরকখি।
ইপিফ্যানি কুমহৈ থোকপা জানুয়ারী ৬, ১৯২৯ ইং, নুমিত অসিমক্তদা অ্যাগনিছ গোনছা কলিকতাদা থুংলখি, অদুবু মহাক লোরেটো সিষ্টারশিংগা লোয়ননা মহৈরোয় অমা ওইনা ট্রেনিং চতনবা কলিকতাদগী অৱাংলোমদা মাইল ৪৫০ লাপ্ন হিমালয় চীংখোংদা লৈবা ডার্জিলিং টাউনদা মহাকপু থারমই। চা পাম্বীতনা পুময়োম য়োমশিনবা হিমালয় চীংখোঙদা লৈবা ডার্জিলিং, বৃটিশ ইন্দিয়াগী কোনুং কলিকতাদা ওইরিঙৈ মতমদা কালেনগী কোনুং ওইরমই। ডার্জিলিং অসি ১৮০০ ইংগী ময়ায় চল্লবপদা বৃটিশনা মখোয়গী সিফাইশিংগী পোতথাফম অমদি মতম লেনফম ওইনা শেমগতখিবদগী হৌদুনা মীনা য়াম্না পাম্নবা চীংগী ষ্টেষন অমা ওইদুনা লাকখি। ইং ১৮২৮ দা বৃটিশ ওফিসার অনী ডার্জিলিংদা মতম খর মতম লেন্দুনা লৈখি, হায়বদি মতমদুদগী হৌনা মসিবু নোংমৈ শীংজং তাফম ডোর্জে লিং, হায়না খঙনখি। বৃটিশশিংনা য়াম্না থুনা লমদমদুগী ঈশিং নুংশিং ফবা অমদি চীংগী ষ্টেসন ওইবা য়াবগী মচাকশিং লৈবা উবদু শীংথাদুনা লৌখতখি। লমদমদুগী নিংথৌবু ভাব তাহল্লবা তুংদ মতিক চানা লমগী ভারা পীরগা শেমগতপা হৌখি। শেমগত শাগতপা য়ামনা য়াঙশিনখি। ইং ১৮৪০ দা লম্বী অমা ফাওহনখি, য়ুম কয়াগা লোয়ননা অশোল অনাগী পোথ্থা শঙলেন অমসু শাব লোইখি, অমদি হোটেল অমা ফম্বা হৌখি। অতোপ্পা চহি ৪০ অমগা হোতনরবা তুংদ চেকশিল্লবা অপিকপা রেল লম্বী অমা ফাওখি। ইং ১৮৫৭ তদি ডার্জিলিং মীশীং ১০,০০০ গুম্বা শুখি।
জিওফ্রি মুরহাউসনা মহাক্কী ইন্দিয়া বৃটেনিকা কৌবা লাইরিক্তা চীংগী ষ্টেষন খুদিংমক অঙৌবশিংনা ময়ুমদগী চতলগা থা অহুম নত্রগা মরী লৈরুবা য়াব য়ুম অমগুম্বনি হায়না লৌনবা মতম অমা লৈরমই অমদি ইন্দিয়ানা মখোয়গী পুন্সি লাপ্ন লংশেকপীরবনি হায়শিন্নরমই। বৃটিশশিংনা লায়রবা, অনা অয়েক, অমদি সহরগী অমোতপদগী য়াম্ন লাপথোক্না লূ নান্না অমদি লেমনা মীনাই থমদুনা লৈরমই।
লাইনিংলোয় নহা অমগী পুন্সিদি অকে অমৌ পুমথা থাদোকপা হায়বসি ওইরমই। অ্যাগনিছ গোনছাগী মমান্নবীশিং অমগী মোত মতুংইন্না, ইং ১৯৩০ গী মতমদা লাইনিংলোয় নহা অমনা লেনখিবা পুন্সি, ঐখোয়না ঙসি উনরিবসিদগী য়াম্না খেননৈ। শিন হৈনবা তম্বীখিবী মিসট্রেস অদুনা ঐখোয় খুদিংমকপু হৈহনখি, করিমুক হায়গনি মহাক্না তম্বীবদু মচা য়াম্না খায়খি। মখোয়গী মরাল তাবীবা ঙম্বা পুরোহিত অদুদা চয়োলগী চতলমই। ঐখোয়না নুংতিগী পুং অনী অয়ুক পুং মাপলদগী তরামাথোই ফাওবা সেন্ট টেরিজাগী স্কুলদা পীকলিবা নিপামচা নুপীমচাশিং লাইরিক তম্বীরমই। কা অমখক লৈবা স্কুলনি, মদুদা অকোয়বদা লৈবা চীংগী ইমুংশিংদগী নিপামচা নুপীমচা ২০ মুক অয়াম্ব মতমদা লাক্তুনা তমলখি। ঐহাক্না মাদর টেরিজাবু য়াম্না চম্বা মী অমা ওইনা থেংনখি। মহাক লোরেটো থাদোকতুনা চতখিগনি হায়বগী ৱাখল অমত্তা খন্নরমদে। মহাক মপুক শেংবী, ধর্ম্ম চেনবী লাইনিংলোয় অমা ওইরমই।
ইং ১৯৩১ মে ২৪ দা অ্যাগনিছ গোনছা লোরেটো সিষ্টার অমগুম্না লায়রবী, লম্বোইবী অমদি হায়বা ইনবী ওইনবা মহাক্কী অহানবা ৱাশক লৌখি। মহাক্না মহাক্কী পেট্রোন সেন্ট, লিজিয়সকী সেন্ট থেরিজা নত্রগা অঙাং ওইরিঙৈ যীজসকী সেন্ট থেরিজা হায়না ময়াম্না খঙনবা অসিদগী লৌরগা মহাক্কী ধর্ম্মগী মিং থেরিজা থোনখি। মহাক্না মিং অদু লোরেটোদা থেরিজা কৌবী লাইনিংবী অমা হানননা লৈরবনা মদুগা মান্নদনবা স্পেনিশকী বনালদা ইবা তাখি।
সেন্ট থেরিজা চহি ২৪ দা ঙনতানা হরা কংখুনা নাবদগী লৈখিদ্রে; অদুবু মহাক্না মিশনশিংবু নুংশিজবা অমদি প্রিষ্টশিংগীদমক লাই খুরুম্বীবা, অখনননা মিশনরীশিংগীদমক তৌরম্বশিং অদুনা পোপকী থম্মোয় হুখিবদগী ইং ১৯২৭ তা মালেমগী মিশনশিংগী পেট্রোন, সেন্ট ফ্র্যানসিস জাবেরিগা লোয়ননা মঙোন্দা সেন্ট মিংথোল পীখি। মহাক্কী মিং খনজরদুনা, সিষ্টার টেরিজানা সেন্ট থেরিজাগী পুন্সিগী ৱাখললোন, শমজিননা হায়রবদ সেণ্ট থেরিজানা ইরম্বা ৱাহৈশিং, “‌অপীকপা ঐগী লম্বীদি থাজবগী লম্বী অমসুং মপুং ফান ইশানা ইশাদ চঙজবা হায়বা ধর্ম্মনা অঙাং ওইরিঙৈ লমদাং অসিনি” অসিবু তশেংনমক পাম্না লৌখতচখি।
ইং ১৯৩৭ মে ১৪ দা সিষ্টার টেরিজা ডার্জিলিংদা লোরেটো সিষ্টার অমগুমনা লায়রবা, য়ুমবান্দবা অমসুং হায়বা ইনবা ওইনবগী ৱাশকশিং পুন্সি চুপ্পা ঙাক্নবা লৌখি। হৌজিক মহাক লম্বোইবী ওইনা হিংবা ঙমলে। ডার্জিলিংগী মতম লোইশিল্লকপগা, সিষ্টার টেরিজাগী সুপরিয়রশিংনা মহাকপু কলিকতা সহরগী নোংপোক থংবা নাকল ইনট্যালি ডিষ্ট্রিক মনুংদা মরাং কায়না লন থুম মপু ওইরিবা লোরেটো সিষ্টারশিংগী মনাক্তা থারমই। মফম অসিমক্তদগী হেননা ৱাবা সহর থোরকখিবা অদুগুম্বা য়াম্ন ৱাবা মফম অমা ওইরমই। লেঙদবা ফকলাঙ অমগী নাকল, চাওরবা কমপাউন্দ অমগী মনুংদা, লোরেটো এন্ট্যালি হায়না খঙনবা, মহৈরোয় ৫০০ মুক্কী স্কুল অমা লোরেটো সিষ্টারশিংনা চলাইরমই। মখোয় মফমদুদা লৈবা অমসুং মদুগী ফী পীবা ঙম্বা ইমুংশিংদগী লাকপা ওইরমই। কম্পাউন্দ অদুগী মনুংমক্তদা, সেন্ট ম্যারীজ কৌবা অতোপ্পা স্কুল অমসু লৈরমই। মসি খর পীকথবা স্কুল অমা ওইরমই, মসিদা তমলিবীশিং মখল মখাগী হৌরকফম ওইবা ইমুংশিংদগী ওইরমই। বাংলা লোন্দা পারা তাকপীরমই, সিষ্টার টেরিজাগীদমক্তদি মমুত তানা খঙগদবা অতোপ্পা লোন অমা ওইরমই। অদুবু মহাক্না লোন অসিবু মমুত তান, হিন্দিগা লোয়ননা খঙদোকলমই। ইংলিসতসু অদু মঙাই, মহাক জিওগ্র্যাফী অমসুং হিসতরিগী ওজা মথং মথং ওইরকখি। স্কুল অনীদা ওজা ওইবগা লোয়ননা কম্যুনিতিগী নুংতিগী লাই তিনগী থবকশিং মপুং ফান য়াওশিনবদা সিষ্টার টেরিজাগী মতম য়াম্ন চিল্লমই।
মাদর টেরিজা সেন্ট টেরিজাগী চচর্চ স্কুলদসু তম্বীরমই। স্কুল অসি য়ৌনবা হোতনবদ মহাক মথকথোংবগী য়াথং হিকতোক্তুনা, ফকলাংনা কোয়শিনবা লাইনিং খুনাইগী অচিকপা পুন্সি থাদোক্লগা কলিকতা সহরগী লম্বীশিং ফাওরগা মখোঙনা চতপা তারমই। নহা ওইরিবী টেরিজাগীদমক্তদি, খেননবা অদু অসুক্কী মতিক হায়নিঙাই লৈরমদে। লাইনিং খুনাইগী লু হেনবা অমসুং অচিকপা তুংওইনরমলগা নিল খোংবা, থুনাম নাঙৈ, অওয়া অনা অমদি স্লম মনাক্কী অমোতপশিং অদু ফাওরগা চতলমই। মফমসিদা ওইরম্বা মীওই পুন্সি, তোন্না খ্বাইদগী শোণ্না, হিংলমই। লায়নানা মখোঙ পান্দুনা চতলমই অদুগা মনম নমথীবনা মফম পুম্নমক কুপলমই। ড্যাবিদ পোর্টরনা সিষ্টর টেরিজানা হায়রম্বনি হায়দুনা অসুমনা পল্লি।
“ঐহাকনা অঙাংশিংগী তুমফম অমদি চাফম অহানবা উরুবমক্তদা, হায়নীঙাই লৈতনা নুংঙাইরমদে। মসিদগী হেনবা লায়রবা অমমুক লৈরমলরোই। অদুবু মখোয় নুংঙাইনা লৈথোকই। অঙাং ওইবা হায়বসি কয়াদা লাইবক ফখ্রবা? ঐখোয়না মখোয়বু থেংনবা অহানবমক্তদা, মখোয় সুকহাও হরাওরমদ্রবসু। মখোয়গী মোতলবা কোকথক খুদিং খুতনা নান্থবীরুবতদা মখোয় চোংদুনা ঈশৈ শকপা হৌরকখি। অসুম্না তৌবা হৌখিবা নুমিত অদুদগী মখোয়না ঐবু‌‌‍, হায়বদি “ইমা” হায়না কৌরকখি। সুকহোত হোতনদনা, চমখ্রবা থৱায়শিংবু কয়াগী মতিক নুংঙাইবা ঙমহল্লিবা!”
স্কুলগী থবক তৌবগী মথক্তা ডোটরস ওফ স্যেণ্ট ম্যারি কৌবা বেঙ্গালি নুপীশিংগী বিসোপ লোয়শং অমসু মাবু য়েংশিনহল্লমই। মহাক্কী পোতথাবা মতম হায়ববু মহাক্কী লাইনিং লম্বী চেতননবগীদমক্তা চহি অমগী মনুংদা অমুক্তং ফংবা ছুটি অদুনি।
কলিকতাসিদা, স্কোপজিগা থমনবা য়াম্না চেতপা মরী অমখক লৈরমই। সিষ্টর টেরিজাবু নৌরিঙৈদা অসুক্কী মতিক ইথিল পীখিবা ব্লেসিদ বারজিনগী সোড্যালিটি (লাইনিং লুপ) সেন্ট ম্যারিজদা কন্না থবক শুরমই। লমদমদুগী সেন্ট টেরিজা কৌবা চর্চ্চ অমগী প্রিষ্ট ফাদর জুলিয়ান হেনরিগী লমজিং মখাদা, সেন্ট ম্যারি খারিবা ফকলাংগী মপান্দা খম থেংনা লায়রদুনা লৈবা ইমুংশিংগী নৌরিবী নুপীমচাশিংবু অৱা অনা কোকননবা মতেঙ পীবা চতপা ওইনা তাকপী তম্বীরমই। থাংজ খুদিং মহৈরোই খর অসিগুম্বা ইমুং ময়াম অমদা চতলমই অদুগা অতৈনা অচৌবা হোসপিটাল নিলরতন সরকারদা চত্তুনা মদুদা লৈরিবা অনংবা অমদি অনাবশিংবু হরাও তয়ামনা লৈহন্নবা হোতনরমই। অদুবু হায়রিবসি সিস্টর টেরিজানা অসুক্কী মতিক পামলম্লবসু, মহাক মখোয়গা লোয়ননা চতপা য়ারমদে। মথক থোংবগী য়াথং ইনবা ওইনা, মহাক চেকপলনা খাজিল্লবা কম্পাউন্দ মনুংদগী হেন্দোক্তনা লৈরমই।
ইং ১৯৪৬ সেপ্টেম্বর ১০ গী ট্রেনগী খোঙচত অমদনি মহাক্না মহাক্কী পুন্সিবু ঈপুরোয়না অমুক্কা হননা থৌদারকলে হায়না ফাওরকখিবসি। মহাকনা মদুবু নৌরিবী নুপীমচাশিংবু “অমনা কৌরিঙৈদা কৌরকপা” হায়না লৌজরমই।
“‌ঐহাক ডার্জিলিংদা চহিগী অমুক্তং ফংবা পোতথাবগী মতম লেল্লুনবা লাইনিংবা চতলমই, মাদর টেরিজানা নিংশিংলদুনা হায়। “‌ট্রেন অদুমক্তদা ঐহাক্না খোঞ্জেল অমা তাখি মদুদি ঈপুরোয়না ঐঙোন্দা মহাকপু সেবা তৌগে হায়রবদি পুমনমক থাদোক্লগা স্লমগী মফমশিংদা মহাক্কী মতুং ইন্দুনা লায়রবদগী লায়ররবশিং অদুগী মতেঙ পাংবীরুচো। মদু ঈপুরোয়গী অপাম্বনি হায়বা ঐহাকনা খঙলমই অদুনা ঐহাকনা মাগী মতুং ইনবা তাখি। মদু ঈপুরোয়গী থবক ওইগনি হায়বসিদা চিংনবা অমত্তা লৈখিদে।” মাদর টেরিজানা মখা তারকখি, “পাওজেল অদু অসুক্কী মতিক ময়েক শেংলমই। ঐহাক ঐহাক্কী লাইনিংলুপ অদু থাদোক্তুনা লায়রবশিংগী মরক্তা লৈমিণ্নরগা থবক তৌবা তাখি। মদু য়াথং অমনি। ঐহাক কনাগীনো হায়বা খঙই, অদুবু ঐহাকনা মফমদুদা করমনা য়ৌগদগে হায়বদুদি খঙখিদে।”
থা অমগী মতুংদা মহাকনা কলিকতাদা হল্লকপদা, মহাক্কী নৌনা ফংবা থবক অদু পায়খতপা য়ানবগী মথৌ তাবা পারমিসন পীবা ঙম্বগী লৈফম হায়বদি মদুগা চপ মান্নবা অনীংবা অদুমক্না মহাকপু ইন্দিয়াদা ইহান হাণ্না থুংখিবা মফম অদুমক্তদা মহাক কুমথখি। সিস্টর টেরিজানা মহাক্কী ৱাখলশিং অদু ওর্ডর অমগী মখাদা মহাক্কা থবক তৌমিন্নরিবা অতৈ মেম্বরশিংদা খঙহল্লমই। মহাকনা কলিকতাগী আর্চবিশোপ য়াওনা অতৈ মথক থোংবশিংদগী মতেঙ লৌবদসু থিনথবা তৌরমদে। আর্চবিশোপনা মহাক্কী ৱারী য়ামনা পুক্নিং চঙনা তারমই। মহাক্কী মমিংদি পনবা তৌদনা, ফাদর হেনরি অমদি মহাক্কী স্পিরিচুয়েল ডিরেক্তর ফাদর সিলেষ্টি বান একজেম মখোয় অনীগা আর্চবিশোপনা ৱা তাণ্নরমই।
স্পিরিচুয়েল ডিরেক্তর অমগা লম্বোইবী অমগা লৈনবা মরী অসি মতম পুমনমক্তা অখণ্নবা অমনি। ফাদর বান একজেমনা নৌজরিবী সিস্টর টেরিজাগী লাইনিং পুন্সিদা হকচিনবা মরু ওইবা থৌদাং অমা লৌজখি। “‌কৌরিঙৈ মনুংদ কৌরকপা অমা” হায়বসিবু অহানবমক্তদা মুননা খঙবা ঙম্বা মীশক অমা হায়বদু মহাক্না ওইরমই। আর্চবিশোপনা মহাক্কা লোয়ননা ৱারী শাবা খুদিংমক্তা মহাকপু নীংথিনা লমজিংবীখি, অমদি মহাকনা হায়জখিবা পারমিসন অদু পীনবীরে হায়বগী পাও ফংখিবসি মঙোন্দগীনি। সিস্টর টেরিজানা ফাদর বান একজেমদা অনংবা বেঙ্গালী নুপীনা শেতকদবা সাড়ি অমগা অপিকপা ক্রোস অমগা রোজরি অমগা শেংদোকপীনবা হায়জখিবদু অখননবা অমা ওইরমই। মখোয়শিং অসি মাঙদা তাদুনা লৈরবা থবক অদুগীদমক সিস্টর টেরিজানা খনখিবা খুদম অমসুং শক্তমনি।
অদুনা থবক পায়বা মথৌ তারে হায়বসি চিংনরমদে। মতমদুদা ইন্দিয়া কাং খোং চাইবগী ফিভম অমদা লৈরমই। ঐলীন এগ্যান কৌবী নুপী অমনা মহাক্কী লাইরিক সচ এ বিজন ওফ দা ষ্ট্রিট তা ইরি, “ইং ১৯৪৭ অসি ইন্দিয়ানা নীংতম্বা ফংগদবা চহি ওইরমই, মতম অদুদা, উপ মহাদেশ অসিবু পাকিস্তান অমসুং ইন্দিয়া থোক্না খায়দোক্তুনা, নৌনা য়াতখিবা ঙমখৈশিং ঈগী ঈরোননুং অমদা লুপলমই... য়েনথোক্নদুনা, ইতিহাসতা খ্বাইদগী মশীং য়ামনা লাঞ্জেন্নবশিং মনুংদা অমা ওইখি।
নিপা, নুপী অমদি অঙাং মিলিয়ন ১৬ লোম লৈফম লৈরমদে, হিন্দুগা শিখশিংগনা ইন্দিয়াদা অদুগা মুস্লিমশিংনা পাকিস্তানগী নৌনা শেম্বা লমদম অনীসি তমনা চেণ্নরমই।” নীংতম্বা ফংনবগী লান হায়বসি লায়রমদে। গান্ধীগী লুচিং মখাদা, খুতলায় পায়দবা লাঞ্জং হৌরকখি অমদি অনীশুবা মালেম লানজাওদা, ইন্দিয়ানা বৃটিশ লৈঙাক্কী থৌদা ইনবা ওইনা য়াওশিল্লকপা মতমদনা হেণ্না মপাঙ্গল কনখতলকখি। চেং হোনদোক হোনজিনদা শীজিণ্নরম্বা হিশিং লানগীদমক লৌশিনখি। অসুমনা ইং ১৯৪৩ দদি ইন্দিয়াগী খ্বাইদগী মাঙ তাকনিঙাই ওইবা চাক তাঙবগী থৌদোক অমদা য়ামদ্রবদা মী মিলিয়ন অনী শিখিরমই।
আগষ্ট ১৬, ১৯৪৬ তা কলিকতাদসু অতোপ্পা অৱাবা থৌদোক অমগা থোকলমই। নুমিত অসি মুস্লিম লীগনা “ডাইরেক্ত এক্সন ডে” হায়না লাওথোক্লমই। মসি থোক্ত্রিঙৈ নুমিত হুমনি মমাঙদা কলিকতা লৈঙাক পুবা মুস্লিম লুচীংবা অদুনা নুমিত অসিবু পব্লিক হোলিডে লাওথোকলমই। মুস্লিম অমসুং হিন্দু অনীগী মরক্তা উংখতনবা খম থেংলমই, নুমিত অদুমক্তদা নুংঙাইনদবদগী য়েংথীনবা অমসুং ফূন-চৈনবরোমদা চতথরকখি। সহর পূম্ব থবক চপ লেপলমই। সিষ্টর টেরিজা মশামক্না হায়খি, “মতমদুদা ঐহাক্না সোড়োক মথক্তা, থাঙনা থিনদতপীরবা, ফুদতপীরবা, অকঙবা ঈদা য়াতাদুনা লৈবা হকচাংশিং উরমই।” কলিকতাসু লৈফম লৈজদ্রবা কয়ামরুমগী লৈফম ওইরকখি, অদুবু সিস্টর টেরিজাখক্তনা মখোয়গী অৱাতপশিং মুণ্না খঙলমই।
অহানবদা আর্চবিশোপনা সিষ্টর টেরিজাবু মহাকনা তৌনিংলিবা থবকশিংদুগী অয়াম্বা হাণ্ননা তৌদুনা লৈরিবা ডোটরস ওফ সেন্ট অ্যানিগী সিষ্টরশিংগা থবক তৌমিননৌ হায়রমই। অদুবু মহাক্না মদু ওইরোই খল্লমই। ডোটরস ওফ সেন্ট অ্যানিগী সিষ্টরশিং লায়রবশিং মরক্তা নোংমতং থবক শুরুবা তুংদগীদি এনটালি কম্পাউন্দগী অৱাংবা ফকলাংনা কোয়শিনবা কনবেন্ট অদুদা হোতচিন্দুনা লৈখি। সিস্টর টেরিজানা কৌরিবদি লায়রবগা লৈমিন্নবা অমসুং মখোয়গা হিংমিন্নবনি।
কনামতনা মসিগা চপ মান্নবা থবক অমত্তা পায়খতখিদ্রি হায়বসি চপ চান উরবা তুংদ, কংগ্রিগ্রেসন থাদোকপগী অয়াবা ফংননবা ডব্লিনদা লৈবা লোরেটোগী মাদর জেনর্যালদা চিঠি ইখিনবা সিষ্টর টেরিজাদা খঙহল্লকখি। মদুদ তশেংনমক করি থোকখিবগে হায়বসিগী মতাঙদা চমমনবা খর লৈবগুম উই। মপান্থোংদা আর্চবিশোপনা সিষ্টর টেরিজাবু “লাইশংনুবী” ওইবগী মহুত্তা, “লাইনিংনা পুন্দবী” হায়বদি অচম্বী নুপী অমগী পুন্সিদা অমুক হনজিনলকপী ওইনা লৈননবা কন্না তকশিল্লকখি। মসিগী ৱাহনদি য়ামনা চেকশিনবা মপানগা শম্নদবা ওর্ডর অমা থাদোকপা ঙম্বী ওইগদবনি হায়বনি, অদুবু লায়রবী, সতিত্ব, অমসুং য়াথং ঙাকপী ওইনবগী ৱাশক্তি ঙাক্কনি হায়বনি। “লাইনিংনা পুন্দবী” ওইননবা সিষ্টর টেরিজাদা অয়াবা পীরকখ্রবসু অনৌবা লাইনিং ফুরুপ অমা শেমননবা মঙোন্দা য়াওনীংবা মী ফংবা য়াম্ন ৱারমই। করিসু কান্নদবদা ফাদর বান একজেমগা আর্চবিশোপকা য়ানরমদে। “মহাক ঈপুরোয়বু মপুং ফান থাজগদবনি,” হায়বসি মহাক্কী পাওখুম ওইরমই। অদুমকপু, মাদর জেনরেলদগী পাওখুম লাকপা মতমদদি, মহাক্না সিষ্টর টেরিজাগী অপাম্বা অদু পীবীরকখি। “লাইশংনুবীগী অপাম্বা” অমগীদমক সিষ্টর টেরিজাবু রোমদা চিঠি ইহনখি। মসিদা আর্চবিশোপ নুঙাইরমদে, অদুনা রোমদা চিঠি ইবা মতমদা “লাইনিংনা পুন্দবী” পীবীনবা ইয়ু হায়রকখি।
রোমনা ৱারেপ হাথুনা লৌরকখিদে, অদুনা সিস্টর টেরিজানা ঙাইবদা য়ামনা ৱারমই। মমৈথংদা পাইয়স ১২ না এপ্রিল ১২, ১৯৪৮ দা অয়াবা পীবিরকখি, অদুবু মদু কলিকতাদদি আগষ্ট ৭ তা য়ৌরকখি। আর্চবিশোপনা মঙোন্দা তৌহননিংবা অদুদগী হেনদোকনা মহাকনা হায়জখিবদু তৌবা য়ারকখি। মহাক লোরেটো ওর্ডর থাদোকপা য়ারকখি অদুবু মহাকনা লায়রনা, য়ুমবান্দনা অমদি হায়বা ইননা হিংননবগী ৱাশক অদুদি ঙাকপা তাখি। অসুমনা হৌজিক মহাক লোরেটো ওর্ডরগী মহুত্তা কলিকতাগী আর্চবিশোপনা হায়বদু ইনবা তারমই অদুবু ওর্ডর অদু থাদোকপা অরায়বা ওইরমদে। মহাকনা থেংখাং কয়াদা লোরেটো ওর্ডর থাদোকপা হায়বসি মহাক্কী পুন্সিদা খ্বাইদগী ৱাবা খোঙথাং অমদি খ্বাইদগী চাওবা কতথোকপনি হায়না মহাক্না ময়েক শেংনা ফোংদোকখি। সিস্টর টেরিজানা হায়, “লোরেটোনা ঐগীদি খুদিংমকনি।” মহাক ওর্ডর অদু থাদোক্কদৌরে হায়বগী পাও অতৈ লমবোইবীশিং খঙবা মতমদা, মখোয়দা থবক অদু ফৈ নত্রগা ফত্তে নৈনগনু হায়রকখি অদুবু মখোয়গা লোয়নবগী লাইদি খুরুমহনখি।
লোরেটো ওর্ডরগী হৈনবী তুংওইনরমলগা, মহাকনা অচম্বা সাড়ি অমা শেত অচম্বা শেন্দল অমা তোং তৌদুনা কলিকতাদগী মাইল ২৪০ মুক লাপনা গঙ্গা তুরেল মপান্দা লৈবা পাটনা সহরদা লাকখি। মেডিক্যাল মিশন সিস্টরশিংগী লৈফমদনি। সিস্টর টেরিজানা খঙলমই মদুদি মহাক্না লায়রবদগী লায়ররবশিংবু মতেঙ পাংবা তারবদি মহাক মেডিক্যালগী মরমদা খরদংদি সুকসোয় সোয়দনা খঙগদবনি। সিস্টরশিংনা থবক তৌবা হোলি ফেমিলি হোসপিটালদগী মহাকনা লায়েংশঙদা অনাবগী ফমুং অমবু করমনা লোইশন খমজিনগনি, হিদাক করমনা কাপকনি অমদি পীজগনি হায়বগুম্বা মরুওইবা মহৈশিং তমখি। মতম খরদং থৱায় য়াওশিননা তম্বদগীদি, মহাক অঙাং পোকপা ফাওবা য়াওবা ঙমখি। অদুবু মহাক্না অতৈ সিস্টরশিংদা ফোংদোকখিবদদি মহাক্কী তুংগী পুন্সিদি ধর্ম্ম, লাইশোল, ঈপুরোয়দা চঙজবা অমদি ঈপুরোয়গীদমক চারা হেনবা অসোমদনা হেনগনি হায়বসিনি। অদুম ওইনমক মহাক্না লায়রবগা থবক নোমমিণ্নবা তারবদি, মশাবু মশানা শেননজবা মথৌ তাই হায়বসি মঙোন্দা ময়েক শেংনা খঙহল্লমই। চাংদমনবা অফবা চীঞ্জাক চাব, নীংথীনা পোথ্থাবা, হকশেল পথাপ ঙাকপা হায়রিবশিং অসি থকসি খাসি ঙাক্ন চতকদবা মহাক্কী পুন্সিগী শরুক অমা ওইবা তারমই। লায়রবশিংগী য়াইফনবা থবক পায়খতপা তারবদি “লায়রবনা চাবগুম খজিক্তং চাও হায়বা মহাক্কী ৱাখললোন অসি থবক্তা ওনথোকপদা য়ামনা খুদোং চারোই হায়না সিস্টরশিংনা মঙোন্দা ময়েক শেংনা খঙহল্লখি।‌‌``
সিস্টর টেরিজানা পাটনাদা থা অহুমলোম মেডিক্যাল মিশন সিষ্টরশিংগা লৈমিন্নরবা মতুং কলিকতাদা হল্লকপগা, লিটল সিস্টরশিংনা চলাইবা অহল ওইরবশিং লৈফম সেন্ট যোসেফ হোমদা মখোয়গা লৈমিণ্নবা চতলমই। মহাক্না অহল ওইরবশিংবু য়েংশিনবগা লোয়ননা এনটালিদা কনবেন্টকী ফকলাং হেক ৱাংমদা লৈবা লায়রবা নত্রগা অহল ওইরবা শিনমীশিংগী লৈফম মোতিঝিলগী লায়রবশিং উনদুনা মতম লেনখি। থবক অসি অরায়বা থবক ওইরমদে, তশেংনমক নাইতোম তারমই। অদুবু মতমদুদা মহাকনা ইরমই, “ঈপুরোয়না ঐহাকপু ক্রোসকী মৈচাক পুদুনা নাইতোম হিংবী লম্বোইবী অমা ওইয়ু তমলমলে। ঐহাক ঙসিদি নীংথিরবা পারা অমা ফারবনি। অনংবশিংগী মৈচাক অসুক্কী মতিক কল্লি। ইখোংদা চৈনাখোল ফাওরফাওবদা পংচত্তা চতখিবা মতমদুদা ঐহাকনা খল্লকখি মখোয়না চীনজাক অমসুং লৈফমগীদমক কয়া য়ামনা ৱারিবা। অদুদগী লোরেটোগী নুংঙাইবদু ঐঙোন্দা মীহৌবা পোকহনখি, অদুবু ইশামক্কী অপাম্বা, ঈপুরোয় অমদি নখোয়বু নুংশিজবনা, ঐহাক অসুম্না হিংবা পামই মদুদি ঐগীদমক ঈপুরোয়গী অশেংবা অনিংবদু ওইনিংবা ওইজসনু ঐহাকনা মদু পাঙথোকপা তাবনি। ঐঙোন্দা থৌনা হাপ্পীয়ু হৌজিকমক, মিকুপ অসিমক্তদা।” সিষ্টর টেরিজানা ঈপুরোয়না পামলিবা অদুফাওবদি পীননবা হোতনরগে খল্লবসু, তশেংনমক মাগীসি ঈপুরোয়গী অপাম্বশিং পীননবা মহাক্না শেম শাদুনা লৈ তাকপনি।
মশাগী থবকপু মপু ওইনা হৌবা য়াগদবা মফম অমতং কদাইদা করম তৌরগা ফংবা ঙমগদগে য়েংদবা য়াদবগী মতম অদু সিস্টর টেরিজাগী মফমদা থুংলখি। মহাকনা ফাদর বান একজেমদা হায়খিবা ৱা অমদি লৈরমই অদুনা মদু ফাদরনা বেঙ্গালী কেথোলিক ইমুং অমগী মাইকেল গোমেজ কৌবা অমদা হংদুনা য়েংখি। মহাক্কী অচৌবা মথোল অহুম লোংবা লোইলম মতমগী য়ুম অমা, ১৪ শূবা ক্রীক স্ট্রিততা লৈরমই। মদু তঙ্খায় অমা হাঙলমই। ৱারী অদুদি য়ুম অদু শীজিণ্নবা য়াগদ্রা হংলুবগী পাওখুম ওইনা মাইকেলগী চহি নৌরিবী মচানুপী মোবেলনা হায়রকখি, “ফাদর, মথক থংবা পুম্নমক পুমহাং হাংদুনা লৈরবনি, মসি সুকশিন শীজিণ্নদ্রবনি; নুপী অদু ঐখোয়গীসিদা লৈরবা য়াগনি।”
ইং ১৯৪৯ ফেব্রুয়ারি থাদ সিস্টর টেরিজা হোংজিল্লকখি। অপীকপা সুতকেস অমা শাগোণ্নরকখি। কা অদুদা চৌক্রি অমা থাদুনা লৈরমই, পোত য়োমনবা উপু অমা ডেক্স ওইনা শীজিণ্নরমই, অদুগা উগী উপু খরসু ফমফম ওইনরমই। সেণ্ট ম্যারিজ এনটালিদা চাকথোংবী ওইবী চোরুর মা কৌবী অমগা লাকমিন্নখি। মখোয় অনী পুণ্না স্কুলগীদমক মথৌ তাব পোতশিং লৈরুনবা কৈথেল কামিণ্নরমই অদুগা লায়রবশিংনা লৈবা শুকঙম ঙমলরোইদবা হিদাক লাংথকশিং খায়বগী থবক তৌবা মাইকেলনা শংলকপা তাঞ্জাদা চতমিণ্নরমই।
থুনমক সিস্টর টেরিজাগী থবক য়াওনিংবশিং ১৪ শুবা ক্রীক ষ্ট্রিততা লাকপা হৌরমই। মার্চ্চ ১৯, ১৯৪৯ দা সুবাসিনি দাস কৌবী সেন্ট ম্যারিজ এনটালিদা মশাগী চহি মাপল শুরকপদগী লৈরকখ্রবী অমা লাক্তুনা কলিকতা স্লমশিংগী থবক অদুদা য়াওজবা য়াগদ্রা হংলখি। চয়োল খর লৈরগা ম্যাগদালেনা গোমেজ কৌবী হাণ্ন মহৈরোয় ওইরম্বী অমসু লাক্তুনা য়াওরখি। থা খর লৈরগা মেম্বর ১০ শুরকখি, অদুবু হাণ্ন লাকখিবী অনীদি বোকেসন চাংয়েং লোয়বগা চতখিরমই। নুংতিগী নুপীশিং অদুনা, সাড়ি শেতলগা, হিংবগী কাননদ্র্রবা নৌরিবা অঙাংশিং অমদি খোঙ লম্বী, ইরম খোংলম অমদি মী কুংবা লম্বীশিংদা নহা অহল খাক্তনা য়েংশিনবীবা লৈতনা শিগদৌরবশিং অখননবা মিতয়েং চঙনবগীদমক সহরগী খ্বাইদগী লায়রবা লৈফমশিংদা থিবা চতলমই।
সিস্টর টেরিজাদা লোরেটো থাদোক্নবগী অয়াবা পীখিবা চহি অমা হৌখিরমলে অদুনা অয়াবা অদু অমুক য়েংশিণ্নবা পুখতনরমই। চহি অদুগী মনুংদা সিস্টর টেরিজা ইন্দিয়ান সিটিজেন ওইরকখি। তশেংনমক মহাক ইন্দিয়া থাদোক্কে সুকখন খনখিদে। অদুনা মহাকনা হায়বা ইনগনি হায়না ৱাশকখিবা কলিকতাগী আর্চবিশোপ অদুনা থবক খুদিংমক হেণ্না চেকশিণ্না অমদি ওফিসিয়েল ওইনা তৌবা য়ারে হায়বগী ৱারেপ লৌরমই। আর্চবিশোপনা সিস্টর টেরিজা অমদি মাগী তুংইনবীশিংবু মহাক্কী আর্চডাইওসিজগী কংগ্রিগেসন অমা ওইনা শকখঙনবা থবক পায়খতপা য়ারে হায়রকখি। শকখঙবা অসিগীদমক রোমদা লৈবা লাইনিং শন্দোক লোয়শঙদা হায়জবা পামলমই। অদুবু চতনবা য়াগদবা চতনা পথাপ অমা অহানবদা ইথোকপা তারমই।
অনৌবা লাইনিংলুপ অদু মিশনরিজ ওফ চেরিটি কৌবা হায়না লেপনরমই অদুগা লায়রবা, সতীত্ব অমসুং ওবিডিয়েন্ট অদুগী মথ্‌ক্তা মরিশুবা ৱাশক অমগা হাপকতপা তারমই। মসি লায়রবদগী লায়ররবশিংদা থম্মোয় শেংনা অমদি নীংতমনা মতেঙ পীবা ওইরমই।
অনৌবা লাইনিংলুপ অদু হৌদোকপগী থৌরম মাসতা, ফাদর বান একজেমনা শকখঙ য়াথং অদু পাঙথোকলমই‌। মদুদা হায়খি, “লায়রবদগী লায়ররবশিংবু লুনা তৌবিবা অমদি নুংশিবিবা মরমগীদমক ঐখোয়গী মিশন অসি মপুং ফাননবা ঐখোয়না চঙশিল্লি।
-টাঊন অমসুং খুঙ্গংশিংদা মালেম শিন থুংনা থওইবিদবা নত্রগা লৈমনদবদগী চমোতনরবা ঙাক্তগী মরক ফাওবা চঙলগা খ্বাইদগী লায়রবা, হুন্দোকপিরমলবা, অশোল-অনা, পুকনিং শোনথরবা, লায়থুং পকলবা, কুমলায়না নারবা, শিগদৌরবা, নিংবা কায়রবা, মাঙখ্রবা, শোক্ন শমনদ্রবশিং থিদোকপনি,
-মখোয়বু য়েংশিনবিবা,

-মখোয়দা মতেঙ পীবিবা,

-লেপ্তনা মখোয়গা উননরুবা,

-হিংদুনা লৈরিবা খৃস্টকী মীনুংশি য়ৌহনবদা অমসুং

-য়াকায়হন্দুনা ঈপুরোয়গী অচৌবা নুংশিবদা।”

......................the rest upto page 134 with photos.

*** Please mail to: rsanabam@gmail.com for the remaining pages for downloading.